УИХ-ын АБГББХ-ны өнөөдрийн хуралдаанаар мансууруулах эм, сэтгэцэд нөлөөт бодисоос үүдэлтэй нийгэмд учирч байгаа аюул, энэ төрлийн бодисын хор хөнөөлөөс урьдчилан сэргийлэх талаар авч хэрэгжүүлж байгаа арга хэмжээний талаарх мэдээллийг сонссон юм. Энэ үеэр УИХ-ын гишүүн Б.Энхбаяр “Ял шийтгэлийн бодлого сул байгаагаас болоод хар тамхины хэрэг өссөн гэж ярих нь маш буруу. Цагдаагийн байгууллагын өгч байгаа мэдээлэл буруу, зөрүү агуулгаар явчихвий. Эмнэлгээ барихгүй байгаа хэр нь шорон л бариад байя гээд  байгаа. Ингэснээр гэмт хэрэг буурна гэж хаана ч байхгүй. Тиймээс хар тамхитай тэмцэх бодлогод хатуу, зөөлөн аргыг хослуулан хэрэглэж байж үр дүнд хүрнэ. Харин зохион байгуулагчдыг огт барихгүй байгаа. Хэрэглэсэн урлаг соёлын оддыг урдаа гаргаж, том гэмт хэрэгтэн мэт харагдуулж, бараг олон нийтийн сурталчилгааг хүртэл хийгээд байгаа мэт харагддаг. Хар тамхитай тэмцэхэд илүү ухаалаг бодлого барих ёстой. Ухаалаг бодлого гэж яриад байгаагийн цаана ялыг нь нэмээд хорино гэсэн ойлголт байхгүй шүү” гэв.

УИХ-ын Аюулгүй байдал, гадаад бодлогын байнгын хороо өнөөдөр хуралдан мансууруулах эм, сэтгэцэд нөлөөт бодисоос үүдэлтэй нийгэмд учирч байгаа аюул, энэ төрлийн бодисын хор хөнөөлөөс урьдчилан сэргийлэх талаар авч хэрэгжүүлж байгаа арга хэмжээний талаарх мэдээллийг сонсож, Засгийн газарт чиглэл өгөх асуудлыг хэлэлцэн дэмжив.

Байнгын хорооны тогтоолоор холбогдох хуулиудад нэмэлт, өөрчлөлт оруулж, УИХ-д өргөн мэдүүлэх, мансууруулах болон сэтгэцэд нөлөөт бодисын судалгаа, тандалтыг явуулах, жагсаалтыг шинэчлэх, эмийн хяналтыг чангатгах, уг бодисыг хэрэглэсэн болон хамааралтай иргэдэд мэргэжлийн тусламж үйлчилгээ үзүүлэх, хүүхэд, залуус руу чиглэсэн сургалт, соён гэгээрүүлэх арга хэмжээг зохион байгуулах, мэргэжлийн байгууллага, орон нутаг болон хувийн хэвшлийн оролцоонд тулгуурлан байгальд ургадаг ургамлын тархцыг тогтоох, устгах ажлыг оновчтой хэрэгжүүлэх арга хэмжээг авч, дээрх ажлын хэрэгжилтийг 2025 оны дөрөвдүгээр улиралд багтаан Байнгын хороонд танилцуулах чиглэл бүхий үүргийг Засгийн газарт өглөө.