Монгол, Хятадын парламентын хамтын ажиллагааг өргөжүүлэх талаар санал солилцов

Улсын Их Хурлын дэд дарга, Улсын Их Хурал дахь Монгол–Хятадын парламентын бүлгийн дарга Ж.Бат-Эрдэнэ БНХАУ-аас Монгол Улсад суугаа Онц бөгөөд Бүрэн эрхт Элчин сайд Шэнь Миньжюаньтай уулзаж, хоёр улсын парламент хоорондын харилцаа, эдийн засаг, хамтын ажиллагааг өргөжүүлэн хөгжүүлэх асуудлаар санал солилцлоо.

Уулзалтын үеэр сүүлийн жилүүдэд Монгол, Хятадын харилцаа бүхий л салбарт идэвхтэй гүнзгийрч, дээд, өндөр түвшний айлчлал, уулзалтын давтамж нэмэгдэн, хөгжлийн стратеги, зорилтыг уялдуулах, худалдаа, эдийн засгийн хамтын ажиллагааг тэлэх чиглэлд үр дүнтэй хамтран ажиллаж буйг талууд онцоллоо. Мөн иргэд хоорондын харилцан ойлголцол улам бэхжиж байгааг отэмдэглэв.

Хоёр улсын парламент хоорондын хамтын ажиллагаа нь Монгол, Хятадын Иж бүрэн стратегийн түншлэлийн харилцаанд чухал байр суурь эзэлдэг бөгөөд харилцан айлчлал тогтмол үргэлжилж байгаад сэтгэл хангалуун байгаагаа илэрхийлж, цаашид эдийн засгийн хамтын ажиллагаанд онцгойлон анхаарахаар санал нэгдсэни бөгөөд Монгол, Хятадын парламент хоорондын Байнгын уулзалтын механизмын VI хуралдаан 2025 оны дөрөвдүгээр сард Улаанбаатар хотноо амжилттай зохион байгуулагдсан бол уг механизмын VII хуралдааныг ирэх онд Бээжин хотноо хийхээр төлөвлөж байна.

Уулзалтын төгсгөлд Ж.Бат-Эрдэнэ дэд дарга Монгол, Хятадын харилцаа, хамтын ажиллагааг хөгжүүлэхэд Элчин сайд Шэнь Миньжюаньгийн оруулж буй хувь нэмрийг өндрөөр үнэлж, талархал илэрхийллээ.

Сэтгүүлч Х.Бямбадалай