Улаанбурхан өвчний тархалт огцом нэмэгдэж, ХӨСҮТ ачааллаа дийлэхгүй болсон. Тус өвчин нь халдварлалт өндөртэй ч вакцинаар сэргийлэх боломжтой халдварт өвчин юм. Хамгийн эрсдэлтэй нь улаанбурхан өвчний тохиолдлууд ихэвчлэн ерөнхий боловсролын сургуульд голомтлон гарч байгаа юм. ХӨСҮТ-ийн зөвлөх эмч Ц.Чинбаяр: зургаадугаар сарын 3-ны байдлаар ХӨСҮТ-ийн эрчимт эмчилгээний тасагт бага насны найман хүүхэд улаанбурхан өвчний хүндрэл, амьсгалын замын дутагдлын байдалтай эмчлүүлж байгаа. Үүнээс долоон хүүхэд нь вакцин хийлгэх нас нь болоогүй буюу 0-8 сартай хүүхдүүд байна. Харин үлдсэн хоёр хүүхэд хавсарсан хүнд өвчний улмаас вакцин хийхгүй хүнд заалттай тул вакцин хийлгээгүй маш хүнд өвдөж байна. ХӨСҮТ-д нийт 164 (0-2 насны) хүүхэд улаанбурхан өвчний оношоор хэвтэн эмчлүүлж байна. Эдгээр хүүхдүүд дархлаажуулалтад хамрагдах нас нь болоогүй эсвэл дархлаажуулалтын бүрэн тун аваагүй буюу нэг тунтай хүүхдүүд байгаа. Тиймээс хүүхдүүдээ дархлаажуулалтад хамруулах шаардлагатай байна гэв.
Хамгийн гол анхаарах зүйл нь вакцин хийлгээгүй хүүхэд улаанбурхан өвчнөөр өвдсөн тохиолдолд богино хугацаанд хүндэрч, нас барах аюултай. Тиймээс эмч нар товлолт вакцинд нь хүүхдүүдээ заавал хамруулахыг зөвлөж байна.
Тиймээс ЭМЯ, Боловсролын яам нэн даруй арга хэмжээ авч, өдөрт зуугаараа нэмэгдэж, хүндрэл өгч байгаа улаанбурхан өвний тархалтыг хумиж авахын тулд ерөнхий боловсролын сургуулийн бага ангийн сурагчдыг амралтыг наашлуулах шаардлагатай байна. Зургаадугаар сарын 9-нөөс бага ангийн сурагчдын зуны амралт эхлэх бөгөөд хэд хоногийн наана ч болов хүүхдүүдээ амраавал өвчний халдвар арай саарна. Ядаж л бүгчим нэг ангид бөөнөөрөө суухгүй, гэртээ тэжээллэг хоол хүнс хэрэглэн өвчлөлөөс сэргийлж чадна гэдгийг эцэг, эхчүүд хэлж, шаардаж эхэлжээ.
