Улаанбаатар хотын авто замын сүлжээг өргөтгөн, түгжрэлийг бууруулах гол төслийн нэг нь Туулын хурдны замын төсөл юм. Хотын зүүн талдаа Баянзүрхийн товчоо, Улаанбаатар-Налайх чиглэлийн авто замаас Баруун аймаг руу салдаг Аюулгүйн тойрог хүртэл зургаан эгнээ 32 километр урт байхаар төлөвлөсөн. Уг төслөөр замын хөдөлгөөний дундаж хурдыг 14 хувиар нэмэгдүүлэх төлөвлөлттэй бөгөөд олон улсын экспресс зам буюу гэрлэн дохиогүй үргэлжилж, зорчигч 32 км замыг зогсолтгүй туулахаараа онцлогтой.
Туулын хурдны зам барих гүйцэтгэгчийг шалгаруулах олон улсын нээлттэй тендерийг өнгөрсөн нэгдүгээр сарын 27-ны өдөр зарлаж, тендер шалгаруулалтыг хуулийн хугацаанд нээсэн боловч оролцогчид тендерийн шаардлага хангаагүй учраас Туулын хурдны замын тендерийг дахин зарлахаар болсон юм. Мөн төслийн хүрээнд найман байршилд хоёр түвшний огтлолцол бүхий уулзвар, 13 байршилд 9870 урт метр гүүр, долоон байршилд 370 урт метр тунель барьж, Улаанбаатар хотыг тойрсон тойрог замын сүлжээг бий болгоно.
