Монголын мод үржүүлэг, цэцэрлэгжүүлэлтийн мэргэжлийн байгууллагуудын холбоо хамтран энэ сарыг дуустал Яармаг дахь “IC Park”-т ойжуулалт, цэцэрлэгжүүлэлтийн “Модлог гарден” экспо үзэсгэлэн худалдааг зохион байгуулж буй.

Энэ талаар, Агрономич С.Наранцэцэг “Модлог гарден” үзэсгэлэн худалдаанд зөвхөн Монголдоо тарьж, ургуулсан модны тарьц, суулгацыг борлуулж байна. Мөн хаана ч, дөрвөн улирлын турш тарьж болох, хөрсөнд суулгамагц ургадаг бортоготой суулгацууд бий.

Монгол Улсын Ерөнхийлөгчийн санаачилгаар “Тэрбум мод” үндэсний хөдөлгөөн хэрэгжсэн. Үүнтэй холбогдуулан иргэд мод худалдан авах соёлд суралцаж, авсан модоо ч зөв суулгах мэдлэгтэй болсон байна.

Айл бүр амьдарч буй орчиндоо таван мод тарихад л эргэн тойрныхоо агаарыг бүрэн цэвэршүүлэх боломжтой. Өсөлт муутай модыг монголынхоо бордоог ашиглан тордоод өгчихвөл сэргэхгүй, ургахгүй мод гэж байхгүй. Бүгд сайхан ургана. Хүн бүр идэвх зүтгэл гарган, айл бүр мод тариасай гэж уриалж байна” гэв.

Тус үзэсгэлэн худалдаанд борлуулагдаж буй модны үрсэлгээ, тарьц, суулгац зэргийн үнийн мэдээллийг хүргэе.

Хун цэцэг

Иш нь шулуун, хааяа зэллэж ургана. Өндгөлжин навчтай, цэцэг нь юүлүүр хэлбэртэй, цагаан, улаан, хөх зэрэг өнгөтэй, нэг болон олон наст өвс юм.

Нэг ширхэг суулгацын үнэ: 2000 төгрөг

Гацуур

Гацуур нь Нарсныхан овгийн мөнх ногоон, шилмүүст мод бөгөөд дэлхийн бөмбөрцгийн хойд хагасын сэрүүн бүс, ой тайгад ургадаг. Хүйтэнд тэсвэртэй, шим тэжээл сайтай чийглэг хөрсөнд ургадаг.

Том, жижгээсээ хамаараад нэг ширхгийн үнэ: 10000-60000 төгрөг

Давхар дэлбээт буйлс

Навч нь эсрэг өндгөн юм уу уртавтар зууван хэлбэртэй. Улаан саарал холтос бүхий богиноссон хатгуур, өргөс бүхий мөчиртэй шим тэжээлийн бодис багаар шаарддаг бөгөөд хөрс хамгаалах ач холбогдолтой ургамал юм. Хавар навчлахаасаа өмнө цэцэглэдэг ба цагаан, ягаан том цэцэгтэй.

Ширхгийн үнэ: 15000 төгрөг

Өргөст хэмх, улаан лоолийн үрсэлгээ – 2000 төгрөг

Барбарис

Энэхүү бутлаг мод нь 2-3 метр өндөр ургадаг бөгөөд хүйтэн болон хуурай цаг уурт дасан зохицсон. 4-8 дугаар сард сайхан үнэртэй улаан, ягаан цэцэгс гардаг. Хараа сайжруулах, хоол боловсруулах системийн үйл ажиллагааг тэнцвэржүүлэх, организмын хөгшрөлтийг сааруулах үйлчилгээтэй. Гурван сард дулаан газар үрслүүлнэ. Ил талбайд тариалаад хоёр дахь жилдээ жимсээ өгч эхэлдэг байна.

Үнэ: 7000 төгрөг

Тэхийн шээг

Тэхийн шээг нь жимсний бутлаг мод бөгөөд эрс тэс, хүйтэн уур амьсгалд усны нөөцийг нэмэгдүүлдэг. Цэцэрлэгжүүлэлт болон гоёл чимэглэлд тохиромжтой. Ардын уламжлалт анагаах ухаанд “Шивүүрт улаагана” гэж нэрлэдэг. Бөөр шээсний замын үрэвсэлт өвчин, хавагнах, ходоод гэдэс, эмэгтэйчүүдийн үрэвсэлт өвчинг анагаах болон биеийн тамир тэнхээг сайжруулахад нэн ашиг тустай.

Үнэ: 10000 төгрөг

Паркийн сарнай

Манай оронд паркийн сарнайн олон сорт бий. Навч нь хар, ногоон өнгөтэй. Цэцэг нь жижиг, анхилуун үнэртэй бөгөөд гэрэл, дулаанд дуртай ургамал юм. Сарнай нь 1.5 метр хүртэл өндөр ургадаг.

Үнэ: 30000 төгрөг

Хуш мод

Монгол оронд таван зүйлийн шилмүүст мод байдгийн нэг нь хуш мод юм. Манай оронд өргөн тархсан энэхүү мөнх ногоон мод нь дунджаар 20-40 метр өндөр ургадаг. Хуш мод нь агаар цэвэршүүлэхээс гадна дуу чимээний 25 хувийг тусгаарладаг. 10-12 жилийн дараа самраа өгдөг.

Үнэ: 10000 төгрөг

Мод тарихад хамгийн чухал нь арчилгаа байдаг. Иймд тус үзэсгэлэн худалдаанаас авсан мод бүрд тохирсон арчилгааны талаарх нарийн зөвлөгөөг мэргэжилтнүүд өгөх юм байна.